विराटनगर ३० भदौ । ब्राइट भिजन ल कलेज विराटनगरमा कानुनका विद्यार्थीलाई अदालतको अभ्यासगत ज्ञान प्रदान गर्ने उद्देश्यले मूटकोर्ट (नमूना अदालत) प्रतियोगिता सुरु भएको छ । प्रतियोगिताको शुभारम्भ कलेजका प्रमुख वरिष्ठ अधिवक्ता चुडामणि आचार्यले गर्नुभएको थियो ।
कानुन अध्ययनमा सैद्धान्तिक ज्ञानसँगै व्यवहारिक तथा अभ्यासगत ज्ञान आवश्यक हुने भएकाले मूटकोर्ट प्रतियोगिता आयोजना गरिएको कलेजले जनाएको छ । विद्यार्थीलाई अदालतमा हुने बहस, मिसिल तयार गर्ने तरिका, बहसनोट लेखन तथा अदालती प्रक्रियाबारे व्यावहारिक जानकारी गराउने उद्देश्यले प्रतियोगिता सञ्चालन गरिएको हो ।
मूटकोर्टमा वास्तविक अदालतको झल्को दिने गरी इजलास सञ्चालन गरिएको छ । अदालतको मर्यादा, प्रक्रिया र अभ्यासलाई ध्यानमा राख्दै विद्यार्थीले न्यायाधीश तथा कानुन व्यवसायीको भूमिकामा रहेर काल्पनिक मुद्दामाथि बहस गरेका थिए । अदालत सञ्चालन तथा न्यायिक प्रक्रियाको अनुभव भएका सरकारी वकिल र अधिवक्तालाई निर्णायकको जिम्मेवारी दिइएको कलेजले जनाएको छ ।
कलेज प्रमुख आचार्यका अनुसार प्रतियोगितामा बीएएलएलबीका पाँचवटै सेमेस्टरमा अध्ययनरत ५ सय विद्यार्थी मध्ये १०४ विद्यार्थी सहभागी छन । गत वर्षदेखि सुरु गरिएको मूटकोर्ट प्रतियोगितामा पहिलो वर्ष १६ समूह सहभागी भएका थिए भने यस वर्ष समूहको संख्या बढेर २६ पुगेको छ । विद्यार्थीको सहभागिता र रुचि बढ्दै जानुले मूटकोर्ट अभ्यासप्रति उनीहरूको आकर्षण बढेको देखाएको उहाँले बताउनुभयो ।
प्रतियोगितामा विद्यार्थीले सुनचोरी तथा पैठारी, संगठित अपराध, अपहरण तथा शरीर बन्धक र कर्तव्य ज्यानसम्बन्धी काल्पनिक घटनालाई मुद्दाका रूपमा प्रस्तुत गरेका छन । ती मुद्दामा विद्यार्थीले सरकारी वकिल तथा प्रतिवादी पक्षका अधिवक्ताको भूमिकामा रहेर कानुनी तर्क, प्रमाण र बहसनोटका आधारमा बहस गरेको कलेज प्रमुख बरिष्ठ अधिवक्ता आचार्यले बताउनुभयो । मूटकोर्ट प्रतियोगिता विश्वभरका विश्वविद्यालयमा हुने गरेको उहाँले बताउनुभयो ।
प्रतियोगिताको सहजीकरण गरेका विद्यार्थी नारायण चौलागाईंका अनुसार मूटकोर्टले विद्यार्थीलाई कक्षाकोठामा पढेको कानुनी ज्ञानलाई व्यवहारमा उतार्ने अवसर दिएको छ । यसबाट अदालतमा बहस गर्ने शैली, मुद्दाको तयारी, कानुनी आधार खोज्ने तथा आफ्नो पक्षलाई प्रभावकारी ढंगले प्रस्तुत गर्ने सीप विकास गर्न सहयोग पुगेको उहाँले बताउनुभयो ।
कलेजमा सञ्चालित प्रतियोगितामा १३ वटा नमूना इजलासमा २६ समूहबीच प्रतिस्पर्धा भएको छ । प्रारम्भिक चरणका प्रतिस्पर्धाबाट उत्कृष्ट आठ समूह क्वाटरफाइनल चरणमा प्रवेश गर्नेछन । त्यसपछि सेमिफाइनल हुँदै प्रतियोगिताको फाइनल मूटकोर्ट प्रतिस्पर्धा आगामी भदौ ६ गते आयोजना गरिने कलेजले जनाएको छ।
प्रतियोगितामा प्रथम हुने समूहले नगद १३ हजार रुपैयाँसहित ट्रफी र प्रमाणपत्र प्राप्त गर्नेछ । दोस्रो हुने समूहलाई नगद ७ हजार ५ सय रुपैयाँ, ट्रफी र प्रमाणपत्र तथा तेस्रो हुने समूहलाई नगद ५ हजार रुपैयाँ, ट्रफी र प्रमाणपत्र प्रदान गरिनेछ ।प्रतियोगितामा उत्कृष्ट बहसकर्ता र उत्कृष्ट बहसनोट तयार गर्ने विद्यार्थीलाई जनही ४ हजार रुपैयाँसहित सम्मान गरिने कलेज प्रमुख आचार्यले जानकारी दिनुभयो ।
मूटकोर्टलाई कानुनका विद्यार्थीलाई भविष्यमा अदालतमा आवश्यक पर्ने व्यावसायिक दक्षता र आत्मविश्वास विकास गराउने महत्वपूर्ण अभ्यासका रूपमा लिएको कलेजले जनाएको छ ।
