उच्च शिक्षालय तथा माध्यमिक विद्यालय संघ नेपाल (हिसान), मोरङले भोटेकोशी बाढी पीडितका लागि ५४ लाख ६५ हजार ८३४ रुपैयाँ सहयोग जम्मा गरेको छ ।
हिसान मोरङले आज विराटनगरमा पत्रकार सम्मेलन प्रधानमन्त्री दैवी प्रकोप उद्धार कोषमा २६ लाख ३३ हजार ५५५ र हिसान केन्द्रीय समितिले बाढी पीडितका लागि प्रदान गर्ने राहत कोषमा २८ लाख ३२ हजार २७९ रुपैयाँ जम्मा गरिएको हिसान मोरङका अध्यक्ष अमित ढकालले जानकारी दिनुभयो ।
विपद्को यो कठिन परिस्थितिमा पीडितहरूको उद्धार र पुनःस्थापनाका लागि सरकारलाई सहयोग गर्नु सबैको सामाजिक दायित्व भएको बताउँदै हिसान मोरङले प्रभावित क्षेत्रमा द्रुत गतिमा पुनःस्थापना र पूर्वाधार निर्माणका कार्य अघि बढाउन सरकारसँग आग्रह गरेको अध्यक्ष ढकालले बताउनुभयो ।
पत्रकार सम्मेलनमा शिक्षादीप मा.विले १३ लाख ५२ हजार, अरनिको मा.विले १० लाख १ हजार १०१, विकेभीएमले १० लाख, मेरिल्याण्ड कलेजले ५ लाख ११ हजार १११, अर्किड मा.विले ५ लाख १ हजार ३४१, कान्तिपुर मा.विले ४ लाख ३५ हजार ६११, सगरमाथा मा.विले २ लाख १ हजार, ग्रीनल्याण्ड मा.विले १ लाख ५५ हजार ५५५, रेड स्टार मा.विले १ लाख ५५ हजार ५५५, सोम्स कलेजले ७९ हजार ५५५, भानु मा.विले २५ हजार, निहारिका कलेजले २५ हजार, लर्डबुद्ध कलेजले २६ हजार, सिद्धार्थ मा.विले ५ हजार ५ रुपैयाँ राहत कोषमा जम्मा गरेको हिसान मोरङका सल्लाहकार दिनेश दाहालले जानकारी दिनुभयो ।
हिसान मोरङमा ३४ कलेज आबद्ध रहेको उहाँले बताउनुभयो ।
