विराटनगर, ४ माघ । मोरङको ग्रामथान गाउँपालिका ६ खोरियाटोलमा आज दिउँसो बम विष्फोट भएको छ । दुर्गाबहादुर रोक्काको खेतको बीचमा लुकाएर राखेको बम विष्फोट हुँदा छोरा १८ वर्षीय एकराज रोक्का गम्भीर घाइते भएको मोरङ प्रहरी प्रमुख एसपी अरुणकुमार बिसीले बताउनु भयो । घाइतेको अनुहार र मुखमा चोट लाग्नुका साथै अगाडिका दुईवटा दाँत भाँचिएका छन् ।

रोक्काको विराटनगर स्थित नोवेल मेडिकल कलेजमा उपचार भइरहेको छ । प्रहरीका अनुसार खेतमा तोरी उखेल्दै गर्दा एकराजले टिनको बट्टामा टेपले बाँधेको अवस्थामा शंकास्पद वस्तु फेला पारेका थिए । बट्टामा बाँधेको वस्तु खोलेर हेर्ने क्रममा विष्फोट भएको प्रहरीले जनाएको छ । एकराजसंगै अन्य चार जना पनि तोरी उलेल्ने काम गरिरहेका थिए । प्रहरीका अनुसार विष्फोटमा परेर घाइते भएपछि काम गरिरहेका अन्यले उपचारका लागि उनलाई अस्पताल पुर्याएका थिए ।

बिसीका अनुसार डिब्बा बम विष्फोट भएको हो । घटनास्थलमा अन्य दुईवटा बम पनि फेला परेका थिए । बमलाई मोरङको थलाहाबाट पुगेको नेपाली सेनाको बम डिस्पोजल टोलीले दिउँसो २ बजे डिस्पोज गरेर अन्य क्षति हुनबाट जोगाएको छ । एसपी बिसीले लुटपाट, चन्दा असुली लगायतका अपराधिक समूहमा आवद्ध भएकाले सुनसान ठाउँमा बम राखेको हुन सक्ने बताउनु भयो ।

बम राख्ने समूहको पहिचान भइनसकेका कारण खोजी तीव्र बनाएर घटनाको गम्भीर रुपमा अनुसन्धान सुरु गरिएको प्रहरीले जनाएको छ । यसैबीच नोवेल मेडिकल कलेजमा उपचार गराईरहेका घाइतेको फोटो खिच्न पुगेका संचारकर्मीलाई त्यहाँका स्वास्थ्यकर्मी र कर्मचारीले दुरव्यवहार गरेका छन् ।

उपचारका लागि अस्पतालमा राखिएका घाइते रोक्काको फोटो खिच्ने क्रममा दन्त रोग विभागका स्वास्थ्यकर्मीले संचारकर्मीको क्यामेरा नियन्त्रणमा लिने प्रयास गर्दै फोटो मेटाउन दवाव दिएका थिए । उनीहरुले अस्पताल पत्रकारको घर नभएको भनेर दुरव्यवहार गर्दै फोटो खिच्नका लागि आगामी दिनमा नआउन चेतावनी दिए ।

अस्पतालका प्रवन्ध निर्देशक सुनिल शर्माले भने नजानेर अस्पतालका स्वास्थ्यकर्मी र कर्मचारीले गल्ती गरेको बताउँदै आगामी दिनमा यस्तो कमिकमजोरी दोहोरिन नदिने प्रतिवद्धता व्यक्त गर्नु भयो ।

सम्बन्धित शीर्षकहरु

धरानमा सप्तरीका दुई कोरोना संक्रमितको मृत्यु

लालबाबु पण्डित साकेला सिली नाच्दै मतदातासग भोट माग्दे विराटनगरमा

विशेषद्वारा परशुराम बस्नेतलाई सफाइ

जीवन विकास समाजको बाँझो जग्गामा खेती अभियान

सर्पदंशका बिरामीको सख्या बढ्दै

आयुर्वेदिक चिकित्सालाई प्रवद्र्धन गरिने : मन्त्री घिमिरे