प्रकाशित : १३ भाद्र २०७७, शनिबार १८:४९

विराटनगर, १३ भदौ । विराटनगरको न्युरो अस्पतालले उपचारका क्रममा मृत्यु भएका पुरुषको शव परिवार र आफन्तलाई बुझाएको एक घण्टापछि कोरोना परीक्षण रिपोर्ट पोजेटिभ आएको छ । मृत्युपछि स्वाव संकलन गरेर पीसीआर परीक्षणका लागि कोशी अस्पताल पठाइएको थियो । दिउँसो २ बजे रिपोर्ट आउँदा मृतकमा कोरोना पोजेटिभ देखिएको थियो ।

मोरङको पथरीशनिश्चरे नगरपालिका–२ का ६२ वर्षीय वृद्ध पुरुषको शव परिवारले बुझेर दाहसंस्कार गर्न लैजाँदै गर्दा पीसीआर परीक्षण रिपोर्ट शनिबार दिउँसो पोजेटिभ आएको हो । मृतकका परिवारले शव बुझेर दिउँसो १ बजेतिरै अस्पतालबाट लगिसकेका थिए ।

न्युरो अस्पतालका डाइरेक्टर इञ्जिनियर रञ्जीतराज बस्नेतले उपचारका लागि ल्याउँदा पुरुषमा कोरोनाको लक्षणसँग मिल्दोजुल्दो ज्वरो आउने, टाउको दुख्ने, वान्ता हुने र श्वासप्रश्वासको समस्या रहेको बताउनुभयो । उहाँका अनुसार पुरुषको मृत्यु शनिबार बिहान ६ बजेतिर भएको हो । मृत्युपछि पनि उपचारमा संलग्न चिकित्सकले शंका लागेर पुनः परीक्षणका लागि स्वाब संकलन गरेर कोशी अस्पतालको प्रयोगशालामा पठाएको उहाँको भनाइ छ ।

अघिल्लो रिपोर्ट नेगेटिभ आएकाले दोस्रो पटकको पोजेटिभ आउनै नसक्ने भन्दै परिवारले लगेर धार्मिक परम्परा अनुसार अन्तिम संस्कार गर्छौ भनेपछि अस्पतालले पनि शव बुझाउनै पर्ने अवस्था आएको अस्पतालले जनाएको छ । रिपोर्ट पोजेटिभ आएको सार्वजनिक भएपछि प्रहरीले शवलाई कानेपोखरीमै रोकेर नेपाली सेनाको ‘बडी’ व्यवस्थापन टोलीको जिम्मा लगाएको थियो ।

इलाका प्रहरी कार्यालय पथरीका डीएसपी दिलिप गिरीले कोरोना पोजेटिभ देखिएको खबर आएपछि पुरुषको शव परिवारका सदस्य र नातेदारबाट फिर्ता गर्दै व्यवस्थापनका लागि नेपाली सेनाको विशेष टोलीलाई जिम्मा लगाइएको जानकारी दिनुभयो ।

मृत्यु भएका पुरुषको रिपोर्ट पोजेटिभ आएपछि शव जिम्मा लिएर लैजाने तथा मृतकको सम्पर्कमा रहेका आफन्त र परिवारका सदस्य तनावमा परेका छन् । पुरुषलाई डेंगुको समस्या देखिएको भन्दै भदौ ३ गते उपचारका लागि न्युरो अस्पताल ल्याइएको थियो ।

सामाजिक संजाल

प्रधान सम्पादक

महेन्द्र विष्ट

9852034125

Official Contact

अरुण खबर मिडिया प्रा. लि.

[email protected]

Web: www.arunkhabar.com

दर्ता जानकारी

कम्पनी दर्ता न.१८१३८८

भ्याट न : ६0६८११२७३