विराटनगर, १ मंसिर । पूर्व उपप्रधान तथा अर्थमन्त्री भरतमोहन अधिकारीको विराटनगरमा आज भव्य नागरिक अभिनन्दन गरिएको छ ।

विराटनगरलाई कार्यक्षेत्र बनाएर लामो समय बिताउनु भएका ८३ वर्षीय अधिकारीलाई अन्तराष्ट्रिय जेष्ठ नागरिक दिवसको अवसर पारेर अभिनन्दन गरिएको हो ।

२०४६ सालको राजनीतिक आन्दोलनअघि विराटनगरमा ल फर्म चलाएर बस्नु भएका अधिकारी २०४६ सालपछि पूर्णकालीन राजनीतिमा लाग्नुभएको थियो । उहाँले २०४६ सालको जनआन्दोलनअघि विराटनगरमा राजनीतिक जागरण ल्याउन भूमिका खेल्नुभएको थियो । उहाँ २०४८, ०५१ र ०५६ तत्कालिन मोरङ क्षेत्र नं. २ बाट निर्वाचित हुनु भएको थियो ।

भरतमोहन अधिकारी नागरिक अभिनन्दन समारोह समितिद्धारा आयोजित कार्यक्रममा पुर्वमन्त्री अधिकारीले विराटनगरलाई स्थायी राजधानी बनाउनु पर्ने बताउनुभयो ।

विराटनगरबाट ६ जना प्रधानमन्त्री ३ जना उपप्रधानमन्त्री बने तर यहाँको मुहार फेर्न सकेनन भन्दै उहाँले भन्नुभयो,‘ अस्थायी हैन अव स्थायी राजधानी नै बनाउनुहोस् ।’ अन्य प्रदेशले प्रदेशको नाम र राजधानी घोषणा गरिसकेको भन्दै ढिला नगर्न आग्रह गर्नुभयो ।

कार्यक्रममा प्रदेश प्रमुख डा. गोविन्दबहादुर तुम्वाहाङले भरतमोहन अधिकारी इमान्दार नेता भएको बताउनुभयो । सानैदेखि राजनीति र अध्ययनमा अब्बल भएको उहाँले बताउनुभयो ।

मुख्यमन्त्री शेरधन राईले नेपाली राजनीतिलाई ठिक ढंगले दिशा निर्देश गर्ने क्षमता भरतमोहन अधिकारीमा भएको बताउनुभयो ।

आफ्नो राजनीतिको प्रेरणाको श्रोत पनि उहाँको भएको मुख्यमन्त्री राईको भनाई छ । कार्यक्रममा प्रतिनिधिसभा सदस्य मुकुन्द न्यौपाने, सामाजिक विकास मन्त्री जीवन घिमिरे, विराटनगर महानगरपालिकाका प्रमुख भीम पराजुली, मोरंग व्यापार संघका अध्यक्ष पवन सारडा लगायतले बोल्नु भएको थियो ।

सम्बन्धित शीर्षकहरु

प्रदेश १ मा ४४७ डिस्चार्ज, २०७ संक्रमित थपिए

फिबर क्लिनिक अबिलम्व सञ्चालन गर्न निर्देशन

प्रेस संगठन मोरंगको शुभकामना आदान प्रदान

कोरोना भाईरसका शंकास्पद विरामीको नमूना परिक्षण विराटनगरबाटै गरिने

श्रममैत्री संस्कृतिको विकास विषयक अन्र्तक्रिया

सडक सुशासन लागू गर्ने प्रदेश सरकारको तयारी