विराटनगर, १ असोज । मोरङका सीमावर्ती विभिन्न नाका हुँदै भारततर्फ हुने कालो मरिचको तस्करीमा भारतीय सवारी साधनको प्रयोग गर्ने क्रम बढेर गएको पाइएको छ ।

विशेष गरेर रातको समयमा भारतीय सवारी साधन प्रयोग गर्दै मरिच तस्करी हुने गरेको पाइएको हो । तेस्रो मुलुकबाट नेपालमा आयात हुने मरिच विभिन्न नाका हुँदै भारततर्फ तस्करी भइरहेको छ । दिउँसो मरिच कटाउँदा सुरक्षाकर्मीलाई छल्न नसक्ने भएपछि रातको समयमा तस्करी हुने गरेको निस्कर्ष सुरक्षा अधिकारीको छ ।

मसलाका रुपमा प्रयोग हुने मरिच भारत पुर्याउँदा एक किलोग्राममा चार सय रुपैयाँ सम्म फाइदा हुने भएका कारण मरिचको तस्करी बढेको प्रहरीको भनाइ छ ।

भारततर्फ लैजाँदै गरेको भेट्टाएर सशस्त्र प्रहरीको टोलीले मोरङको जहदा गाउँपालिका १ बाट गय राति एक सय किलोग्राम मरिच बरामद गरेको छ । दुईवटा भारतीय नम्बर प्लेटको मोटरसाइकलमा राखेर लैजाँदै गरेको अवस्थामा मरिच नियन्त्रणमा लिइएको सशस्त्र प्रहरी वल नेपाल गुल्म हेड क्वाटर (राजश्व तथा भन्सार गस्ती सुरक्षा) ९ नम्बर गुल्म मोरङका डीएसपी सुरेन्द्रराज रन्जितले बताउनु भयो ।

उहाँका अनुसार मरिच लग्दै गरेको बीआर ३९ बी २५२० र बीआर ३८ के ६६९६ नम्बरका दुईवटा मोटरसाइकल पनि नियन्त्रणमा लिइएको छ । डीएसपी रन्जितका अनुसार मरिच तस्करीमा संलग्नहरु सशस्त्र प्रहरीको टोली देख्ने वित्तिकै मोटरसाइकल छाडेर फरार भएका छन् ।

बरामद गरिएको मरिच र नियन्त्रणमा लिइएका मोटरसाइकललाई आवश्यक कारवाहीका लागि आज विराटनगर भन्सार कार्यालयमा बुझाइएको छ । तेस्रो मुलुकबाट ल्याएर मरिच तस्करी हुन थालेको पाइएपछि सीमावर्ती सबै नाकामा निगरानी बढाइएको उहाँको भनाइ छ ।

नेपालमा छ सय २५ रुपैयाँ सम्म पर्ने मरिच भारत पुर्याएपछि भने एक हजार २५ रुपैयाँ सम्ममा विक्री हुने गरेको व्यापारीहरुको भनाइ छ ।

नेपालमा भन्दा भारतमा महँगो हुने भएकाले सीमा क्षेत्रबाट भारततर्फ हुने मरिच तस्करी नरोकिएको भन्सार कार्यालयले जनाएको छ ।

प्रति किलो एक सय १३ रुपैयाँ राजश्व तिरेर भने मरिच बैधानिक रुपमा भारत लैजान पाइने विराटनगर भन्सार कार्यालयका प्रवक्ता सुशील थापाले बताउनु भयो ।

सम्बन्धित शीर्षकहरु

विषादी मिसिएको पानी पिउँदा २८ विद्यार्थी बिरामी

प्रदेश १ सरकारको एक बर्ष उपलब्धि विहिन : काँग्रेस

एनआइसी एशिया बैंकको निक्षेप योजना

राष्ट्रिय परिचयपत्रले नागरिकको पहिचान र परिचय खुल्नेछ : मुख्यमन्त्री राई

अपाङ्गता भएका व्यक्तिहरुले उत्पादन गरेका सामाग्रीहरुको प्रदर्शनी शुरुहुँदै

जीवन शैलीका कारण क्यान्सर रोगका विरामी बढ्दै : मन्त्री घिमिरे