विराटनगर १९ असोज । नेपाली कम्युनिस्ट पार्टी (नेकपा) का वरिष्ठ नेता तथा पूर्वप्रधानमन्त्री झलनाथ खनालले समाजवादी जागरण अभियान घोषणा गरेका छन् । आज काठमाडौंमा पत्रकार सम्मेलन गर्दै खनालले वामपन्थी आन्दोलनलाई वैचारिक तथा राजनीतिक रूपमा पुनर्गठन गर्ने उद्देश्यले अभियान अघि बढाइएको बताउनुभयो ।
खनालको नेतृत्वमा शनिबार भएको गोप्य भेलाबाट पारित प्रस्तावबारे पत्रकार सम्मेलनमार्फत जानकारी दिइएको हो । भेलामा नेकपा तथा विभिन्न वामपन्थी दलका ७० भन्दा बढी नेता सहभागी भएको आयोजक पक्षले जनाएको छ ।
अभियानमार्फत कम्युनिस्ट आन्दोलनलाई क्रान्तिकारी कार्यदिशाका आधारमा पुनर्गठन तथा पुनर्संरचना गर्दै वैचारिक र राजनीतिक एकताको आधार निर्माण गर्ने प्रस्ताव पारित भएको छ । प्रस्तावमा भनिएको छ, ‘कम्युनिस्ट आन्दोलनलाई क्रान्तिकारी कार्यदिशाका आधारमा पुनर्गठन र पुनर्संरचना गर्दै वैचारिक तथा राजनीतिक एकताको आधार निर्माण गर्न सबै कम्युनिस्ट समूहहरूसँग हार्दिक आग्रह गर्दछ ।’
खनालले सम्पूर्ण कम्युनिस्ट क्रान्तिकारीलाई वैचारिक तथा राजनीतिक कार्यदिशाका आधारमा एकताबद्ध गर्दै एकीकृत कम्युनिस्ट पार्टी निर्माणको दिशामा अघि बढ्ने बताएका छन् । भेलाबाट पारित प्रस्तावमा विगतका अनुभव, उपलब्धि, कमजोरी र चुनौतीको समीक्षा गर्दै क्रान्तिकारी वैचारिक तथा राजनीतिक कार्यदिशाका आधारमा संगठनात्मक पुनर्गठन र एकीकरणको प्रक्रिया अघि बढाउन आह्वान गरिएको छ ।
अभियानमा यसअघि नेकपा (माओवादी केन्द्र) बाट बाहिरिएका हरिबोल गजुरेल, महेश्वर दाहाल, पानीराज बम्जनलगायत नेताहरू सहभागी भएको बताइएको छ ।
